Opisyal nang gawasnon si Mary Jane Veloso, human siyang gihatagan og absolute pardon ni Pangulong Ferdinand Marcos Jr. Pormal ang iyang pagpagawas gikan sa Correctional Institution for Women kagahapon, Biyernes, Setyembre 25, human personal nga gihatagan siya sa Bureau of Corrections og kopya sa pardon ug opisyal nga release order.
Ang absolute pardon mitangtang sa nahibiling legal nga mga epekto sa iyang conviction, nga naghatag kang Veloso og higayon nga makabalik sa iyang pamilya ug makapadayon sa iyang kinabuhi gawas sa prisohan.
Si Veloso nadakpan sa Indonesia niadtong 2010 human makit-an sa iyang maleta ang 2.6 kilos nga heroin ng ana sentensiyahan og death penalty tungod sa drug trafficking. Niadtong 2015, pipila lamang ka oras sa wala pa ang iyang gikatakdang execution, nakadawat siya og reprieve human nangayo og konsiderasyon ang kanhi Presidente Benigno Aquino III ngadto sa gobyerno sa Indonesia.
Niadtong Disyembre 2024, nabalik si Veloso sa Pilipinas ubos sa kasabotan tali sa Pilipinas ug Indonesia aron diri niya ipadayon ang nahibiling sentensiya.
Matud sa Bureau of Corrections, i-endorse si Veloso ngadto sa lokal nga kagamhanan sa iyang lugar sa Nueva Ecija aron matabangan sa iyang reintegration, lakip ang livelihood assistance, social welfare support, counseling ug skills development.
Photo courtesy: PNA
