Gipangita na sa mga otoridad ang usa ka persona nga giingong nakaimpluwensya sa menor de edad nga nalambigit sa makamatay nga pagpamusil sa usa ka eskuylahan sa Banga, South Cotabato, pinaagi sa mga panag-istoryahanay online.
Matud ni Department of the Interior and Local Government Secretary Jonvic Remulla, naa sa Pilipinas ang maong persona ug nahibal-an na sa mga otoridad ang iyang lokasyon.
Giingon ni Remulla nga gipahimuslan sa persona ang mga kahuyang ug kawalay-kumpiyansa sa estudyante ug gidasig kini sa paghimo og kapintasan, pinaagi sa saad nga makahatag kini kaniya og pag-ila.
Una nang gipahayag ni Remulla nga nasumpay sa mga imbestigador ang lihok sa junior high school student sa iyang pagkaladlad sa gitawag nga deep dark web, diin gihimaya ang kapintasan.
Samtang, seryoso nang gitan-aw sa mga otoridad ang mga hulga online nga may kalabotan sa pagpamusil sa mga eskuylahan, ilabina human sa mga insidente sa Tacloban, Zamboanga ug Cotabato.
Giawhag usab ni Remulla ang mga ginikanan nga bantayan ug giya-an ang ilang mga anak aron masayran dayon kon adunay mga timailhan nga nadani kini sa kapintasan online.
