Padayon ang pagpalapad sa merkado sa mga produktong pang-agrikultura sa Pilipinas human ipadala ngadto sa Canada ang preskong durian ug mangosteen.
Matud sa Department of Agriculture, kabahin kini sa paningkamot sa gobyerno nga makapangita og bag-ong merkado alang sa mga produkto sa lokal nga mga mag-uuma aron madugangan ang ilang kita ug mapalambo ang panginabuhian sa kabanikanhan.
Unang 300 kilos nga durian ug 120 kilos nga mangosteen ang gipadala ngadto sa Vancouver, samtang laing 300 kilos nga durian ug 200 kilos nga mangosteen ang gikatakdang ipadala ngadto sa Toronto.
Gidala ang mga prutas pinaagi sa mga biyahe sa Philippine Airlines. Matud sa DA, nakabase ang pagpadala sa Canada sa kasinatian sa mga exporter sa France, diin nakapadala na og preskong durian ug nagpadayon ang matag-semana nga pag-export.
Photo courtesy: istock
