Nagpabiling abli ang buhatan sa Department of Labor and Employment kon DOLE Region X sa paghatag og tabang sa mga trabahanteng naapektuhan sa pagsarado sa Sanjia Steel Corporation nga nahimutang sa Tagoloan, Misamis Oriental.
Saysay ni DOLE X, Technical Director, JV Vasallo nga nikabat sa 317 ka trabahante ang ilahang naprofile kung asa 277 niini ang naka-avail sa TUPAD Program sa buhatan.
Gawas niini nga programa pipila ka intervention na sab ang ilahang nahatag sa mga trabahante sama sa livelihood programs ug mga trainings inubanan sa tabang sa ubang national government agencies.
Saysay ni Director Vasallo nga tungod wala pay kasiguraduhan nga makabalik sa trabahabo ang gatusan ka mga Sanjia Workers, padayon ang ilahang buhatan sa pagdawat sa mga trabahante nga mudangop aron nga makapangayo og tabang.
Lakip sab sa dakong problema karon sa mga workers ang mga benepisyo nga wala pa nahatag kanila hangtud karon, sukad nga nasarado ang kompanya kaniadtong bulan sa Hunyo.
Dugang ni Vasallo, wala pa nakuha sa mga trabahante ang ilahang ulahing sweldo lakip na separation pay ug uban pang benepisyo busa gitabangan sa DOLE nga maduso kini ngadto sa National Labor Relations Commission (NLRC).
Photo courtesy: DOLE NorthMin
