Kung ikaw ang klase sa tawo nga dali ma-bored sa elevator, basin para nimo ang Guangzhou CTF Financial Centre sa China! Kay ang duha ka express elevator niini, makahatud gikan sa ground floor paingon sa 95th floor sulod lang sa 43 segundos.
Sa tinuod lang, dili na ni ordinaryong elevato, sama gi-launch kini paingon sa langit. Makaabot kini og tulin nga hangtod 72 kilometers per hour—mas paspas pa sa daghang sakyanan sa highway.
Para makaya ang maong katulin, espesyal ang disenyo sa elevator. Aerodynamic ang elevator car, ug naa pay sistema nga mokontrol sa vibration aron dili ka mag-uyog-uyog samtang paspas ang saka.
Apan dili lang katulin ang problema. Kung kalit ang paghunong, ang brake pads mahimong moabot og 300 degrees Celsius tungod sa friction. Ug para dili mobuto ang imong dunggan sa kalit nga pagsaka, kontrolado usab ang air pressure sulod sa elevator.
Mao nga kung mosakay ka ani, 43 segundos ra ang biyahe, pero basin 43 minutos imong pangitaon asa nahabilin imong kalag!
Photo courtesy:Engadgets
