Nagpahigayon og ocular visit ug konsultasyon ang Local Government Unit of General Santos City pinaagi sa City Housing and Land Management Office o CHLMO niadtong September 17, 2026, sa yutang sakop sa Certificate of Ancestral Land Title o CALT No. R12-GSC-0620-00031.
Ang CALT usa ka titulo nga nag-ila sa katungod sa Indigenous Peoples o IPs sa ilang ancestral land o yutang katigulangan. Gihimo ang pagbisita human mangayo og concurrence o pag-uyon sa City Government ang mga pamilya nga naghupot sa maong CALT bahin sa propiedad.
Atol sa ocular visit, gisusi sa CHLMO ang palibot ug utlanan sa yuta aron mas klaro ang aktuwal nga kahimtang sa propiedad ug ang mga concern nga giatubang sa mga CALT holder families.
Human niini, nagpahigayon og konsultasyon ang CHLMO uban sa mga pamilya aron ipasabot ang mga kinahanglanong dokumento, requirements ug compliance nga kinahanglan matuman sa sunod nga proseso.
Gipasiugda sa City Government nga ang pag-atubang sa mga concern kabahin sa yuta kinahanglan pinaagi sa hustong koordinasyon, transparency ug pagsunod sa balaod ug mga regulasyon.
Kabahin kini sa paningkamot sa administrasyon ni Mayor Lorelie Geronimo Pacquiao nga matubag ang mga concern sa yuta ug housing ug mapalambo ang responsable ug inclusive nga pag-uswag sa General Santos City.
