Gilaraw sa City Disaster Risk Reduction and Management Office (CDRRMO) sa Pagadian City, ang pagpahigayon og Basic Life Support training sa 14 ka coastal barangay sa syudad. Sumala kang CDRRMO Head Engr. Vince Quipot, nakigkoordinar na ang ilang opisina sa mga barangay alang sa maong programa.
Tumong niini nga matag pamilya adunay labing menos usa ka miyembro nga adunay kahibalo sa Basic Life Support, aron mas maandam sila sa pagresponde panahon sa emerhensiya.
Sama na lamang kon may mga insidente sa pagkalumos ug uban pang sitwasyon nga nagkinahanglan og unang tabang. Gitudloan ang mga residente kung unsay hustong unang buhaton samtang naghulat sa pag-abot sa emergency responders.
Gilauman sa CDRRMO nga pinaagi sa maong programa, mas daghan pang mga pamilya sa mga coastal barangay ang mahimong andam sa pagluwas og kinabuhi samtang naghulat sa pag-abot sa mga emergency responders.
