Gipahugtan sa audit requirements ang Securities and Exchange Commission o SEC alang sa mga kompanyang adunay dagkong kontrata sa gobyerno, ilabina sa nagpadayong pagsusi sa mga alegasyon sa iregularidad sa flood control projects. Ubos sa SEC Memorandum Circular Number 26, Series of 2026, kinahanglan nga ang mga kompanyang adunay government contracts mogamit og independent external auditors nga adunay tukmang accreditation depende sa kantidad sa ilang mga kontrata.
Ang kompanyang adunay usa ka kontrata nga sobra sa 750 million pesos, o pinagsamang mga kontrata nga molapas sa one billion pesos, kinahanglan mogamit og Group A accredited auditor. Samtang ang adunay kontrata nga mokabat sa P400 million hangtod P750 million, o cumulative contracts nga P500 million hangtod one billion pesos, kinahanglan mogamit og Group B auditor.
Samtang gisusi usab sa SEC ang kalidad sa audit ug sa track record sa mga independent auditor. Mahimong dili dawaton ang accreditation kung adunay seryosong paglapas sa auditing standards, kakulang sa independence, gross negligence, o kapakyasan sa pagkuha og igo nga ebidensya sa audit.
Kinahanglan usab nga ang mga kompanyang adunay government contracts mosumite og notarized nga listahan sa ilang mga proyekto, lakip ang kantidad, status ug gidugayon sa kontrata, nga kinahanglan maapil sa auditor’s report.
Matud sa SEC, ang bag-ong requirements ipatuman sa audits sa financial statements alang sa fiscal year o accounting period nga matapos sa June 30, 2027, ug sa mga mosunod nga panahon.
Photo courtesy: Wikipedia
