Gilauman sa Pilipinas ang positibong tubag gikan sa Washington, samtang nagpadayon ang negosasyon kalabot sa 12.5 porsyento nga taripa nga gipahamtang sa Estados Unidos sa mga produkto nga gi-eksport gikan sa Pilipinas tungod sa mga kabalaka sa mga produkto nga giingong nalambigit sa forced labor. Atol sa usa ka press briefing sa wala pa ang 58th ASEAN Economic Ministers’ Meeting, gipahayag ni Trade Undersecretary Allan B. Gepty nga naghulat ang gobyerno ang tubag sa United States Trade Representative (USTR) sa ilang bag-ong gilusad nga joint administrative order (JAO) nga nagtumong sa pag-imbestigar sa mga gi-import nga produkto. Dugang niya nga nagpabiling malaumon ang nasud tungod kay nahimong bukas ang gobyerno sa pagpakig-alayon sa US.
Niadtong Hulyo, nagpagawas ang gobyerno sa Pilipinas og JAO nga naglatid sa mga lagda sa imbestigasyon ug pagdili sa pag-import sa mga produkto nga ginama pinaagi sa pinugos nga pagtrabaho. Ang hiniusang mando nagtukod og usa ka inter-agency committee nga gipangunahan sa Department of Trade and Industry (DTI) ug Department of Finance (DoF), uban sa Bureau of Customs, Bureau of Investments, ug Philippine Economic Zone Authority. Tumong sa lakang ang pagpanalipod sa mga konsumidor, mamumuo, ug negosyante gikan sa mga abusadong pamaagi sa pamatigayon, ingon man ang pagpakita sa pasalig sa Pilipinas sa responsableng negosyo ug internasyonal nga labor conventions.
Gituohang matubag sa mando ang mga kabalaka sa US nga hinungdan nganong gipahamtangan ni US President Donald J. Trump og 12.5 porsyento nga taripa ang mga produkto sa Pilipinas niadtong Hulyo human giingong napakyas ang nasud sa pagpugong sa mga smuggled nga produkto gikan sa forced labor. Mokabat sa $6.25 bilyon nga kantidad sa mga produkto sa Pilipinas—lakip ang mga sapatos, sinina, ug mga dulaan—ang apektado sa taripa. Bisan pa niini, gipadayag ni Trade Undersecretary Ceferino S. Rodolfo nga wala’y isyu ang Pilipinas sa butang, apan padayon gihapon ang ilang pakig-istorya sa US aron masulbad kini, ilabina kay ang US gihapon ang kinadak-ang merkado sa mga gi-eksport sa Pilipinas nga niabot sa $10.14 bilyon gikan Enero hangtod Hulyo.
Photo courtesy: ff
