Miabot sa 107,677 ang kinatibuk-ang gidaghanon sa mga taong nagpangidaron og 100 years old pataas sa Japan, diin kini ang unang higayon nga milapas sa 100,000 ang populasyon sa mga centenarians sukad gisugdan ang pagtala niadtong 1963. Sumala sa Japan health ministry, misaka kini og 7,914 kumpara sa miaging tuig, ug kini na ang ika-56 sunod-sunod nga tuig nga nakatala og rekord nga labing taas. Sa kinatibuk-ang ihap, 94,298 o halos 90% niini mga babaye.
Makita ang dako nga pag-uswag kon itandi kaniadtong 1963 nga adunay 153 lamang ka centenarians sa Japan. Mipaspas kini hangtod nga milapas sa 1,000 niadtong 1981, nahimong 10,000 niadtong 1998, ug niabot sa 50,000 niadtong 2012.
Sa pagkakaron, ang pinakatiguwang nga buhi nga babaye sa Japan si Fuyo Kishimoto nga nagpangidaron og 114 gikan sa Kyoto, samtang si Hikaru Kato nga 112 anyos gikan sa Kumamoto ang pinakamatiguwang nga lalaki. Nagpabilin usab ang Japan sa mga nasud nga adunay labing taas nga life expectancy, nga anaa sa 81.35 ka tuig alang sa mga lalaki ug 87.33 ka tuig alang sa mga babaye niadtong 2025.
Photo courtesy: Gulf News
