Nanawagan si Konsehal Jonjon Rodriguez sa Land Transportation Franchising and Regulatory Board o LTFRB ug sa uban pang hingtungdan nga ahensya nga tagdon ug unahon ang pagkuha sa mga lokal nga drayber kon madayon ang operasyon sa mga Green GSM Taxis dinhi sa dakbayan sa Cagayan de Oro.
Atol sa sesyon sa konseho, gihisgutan ni Rodriguez ang kabalaka sa mga lokal nga drayber sa ilang panginabuhian, bisan pa man nga pabor sila sa usa ka hapsay ug berde nga kinaiyahan.
Gumikan niini, gihangyo ni Rodriguez ang pagtambong sa LTFRB sa sunod nga mga miting aron masusi ug mahan-ay pag-ayo ang isyu. Gilayon usab nga gikatakda ang usa ka panagtigom karong Septiyembre 22 uban sa mga GSM operators, Mayor Rolando “Klarex” Uy, mga kooperatiba, ug sa Roads and Traffic Administration aron tukion ang operasyon, mga limitasyon, ug ang regulasyon niini.
Kahinumduman nga una nang gipasabot sa LTFRB Region X nga ang nagasulod nga mga GSM Green Taxi sa syudad, igo pa lamang sa mapping ug testing, busa nakakuha kini silag atensyon sa publiko tungod nagapamasahero na sila sa sulod sa syudad nga wala pay pagtugot.
Photo courtesy: CdeO City Council/Facebook
