Nagpahimangno ang Maritime Police sa mga operator sa sakyanang pandagat, mga biyahero ug mga mangingisda nga likayan ang bisan unsang ilegal nga kalihokan sa kadagatan, lakip na ang smuggling ug uban pang kalapasan sa balaod.
Gipasiugda sa kapulisan ang pagpalig-on sa pagbantay sa mga pantalan ug kadagatan aron mapugngan ang pagpasulod o pagpagawas sa mga ilegal nga produkto ug kontrabando pinaagi sa mga sakyanang pandagat.
Gipahinumdoman usab ang mga mangingisda nga likayan ang ilegal nga pamaagi sa pagpangisda ug mosunod sa mga balaod ug regulasyon alang sa pagpanalipod sa mga kahinguhaan sa kadagatan.
Gihangyo sa Maritime Police ang kooperasyon sa publiko pinaagi sa pagreport sa mga kahina-hinalang kalihokan sa dagat ngadto sa pinakaduol nga estasyon sa kapulisan o maritime authorities. Tumong niini nga mapadayon ang kalinaw, seguridad ug kahapsay sa kadagatan sa Zamboanga Sibugay.
