Gisusi sa Department of Energy (DOE) Visayas Field Office ang 16 ka nag-operate nga electric vehicle charging stations (EVCS) sa Metro Cebu aron masiguro nga luwas, kasaligan ug nagsunod sa mga regulatory requirements ang mga pasilidad.
Kabahin sa inspeksyon ang pagmonitor sa compliance sa nagkalain-laing charging stations nga nahimutang sa mga establisemento sa tibuok Sugbo, ilabina karon nga padayong nagkadaghan ang mga pasilidad alang sa electric vehicles.
Gihatagan usab og higayon ang mga EVCS provider nga ipadayag ang ilang mga kabalaka ug mangayo og klaripikasyon kabahin sa accreditation, registration requirements ug charging rates.
Pinaagi sa padayon nga inspeksyon ug koordinasyon sa mga EVCS provider, gitinguha sa DOE nga mapalig-on ang seguridad ug accessibility sa charging facilities, samtang matukod usab ang pagsalig sa mga konsumidor sa paggamit sa mga de-kuryenteng sakyanan.
Photo courtesy: Sugbo.ph
