Nakabsan sa kinabuhi ang 56-anyos nga driver sa motorsiklo human kini nibangga sa usa ka dakong Shacman Trailer Truck sa may National Highway Purok 3, Barangay Sacramento Valley, San Fernando, Bukidnon niadtong nakalabay nga adlaw, pasado alas-10:55 sa gabii.
Base sa inisyal nga imbestigasyon sa San Fernando Municipal Police Station (MPS), nagbiyahe ang trailer truck—nga gimaneho sa 40-anyos nga drayber—paingon sa Valencia City dihang pasaka sa kurbada nga dalan kalit nga nisulod ug nidasmag sa pikas lane ang wala’y plakang Rusi 175 nga motorsiklo. Tungod sa kalit ug kusog nga pagbangga, nakasinati sa grabeng kadaot sa lawas ang driver sa motorsiklo ug opisyal gideklarang Dead on Arrival (DOA) pag-abot sa Bukidnon Provincial Hospital.
Nakakustodiya na sa San Fernando MPS ang driver sa trailer truck ug ang duha ka sakyanan alang sa saktong pagdisposisyon, nasayran usab nga napakyas ang pamilya pagpakita og driver’s license o mga legal nga dokumento sa maong motorsiklo.
Bisan pa nga nagpadayag ug intensyon ang duha ka pamilya nga magpasayloay pinaagi sa usa ka amicable settlement sanglit giila nila ang hahitabo isip aksidente, ipadayon sa kapolisan ang pormal nga imbestigasyon ug legal nga dokumentasyon aron matapos sa husto nga proseso ang maong kaso
Photo Courtesy: San Fernando Municipal Police Station
