Kung kita gani makatunob og gamayng bato, mangita dayon tag tsinelas pero lahi gyud ning Irishman nga si Eamonn Keaveney. Kay imbes magdala og sapatos sa iyang biyahe, iyang mga tiil mismo ang gisabak sa kalsada. Nasayran nga gilibot niini ang 6,800 kilometros gikan Istanbul, Turkey padulong sa Ireland sulod sa 369 ka adlaw nga walay sapatos o bisan unsang panalipod sa tiil.
Apan dili lalim ang iyang adventure kay tungod sa sige niyang paglakaw sa aspalto, nangapudpod ug nagdugo ang iyang mga lapalapa. Og natunok pa kini nga hinungdan sa impeksiyon sa iyang tiil.
Nasagubang niini ang grabe nga kainit sa adlaw, kabugnaw sa winter season sa mga nasud nga iyang naagihan sama sa Bulgaria, Romania, Hungary, Austria, Germany, France, England ug Wales ayha pa nakaabot sa Ireland.
Apan bisan pa sa mga sakit ug kalisod, wala gyud siya moundang sa iyang misyon ug nakuha pa gani niya ang Guinness World Record alang sa longest barefoot journey. Mao nga kung makakita mo og tawo nga naglakaw nga walay sapatos, ayaw dayon kataw-i. Basin nisalmot na siya sa mga GWR.
Photo Courtesy: Dscover SWNS
