Gipangayo ni General Santos City Lone District Representative Shirlyn Banas-Nograles ang full support sa Senado sa House Bill No. 9616 nga nagtinguha sa pag-convert sa Dr. Jorge Royeca City Hospital ngadto sa full-fledged medical center.
Matud ni Banas-Nograles, sobra na sa kapasidad ang 200-bed hospital tungod sa kadaghan sa mga pasyente gikan sa GenSan ug sa nagkalain-laing lugar sa Region 12.
Gipasabot usab niya nga ubos ang hospital bed capacity sa rehiyon, hinungdan nga ang ubang pasyente napugos sa pagbiyahe og dugay ngadto sa Davao City alang sa specialized medical treatment.
Kung mahimong medical center ang Dr. Jorge Royeca City Hospital, madugangan ang mga serbisyo sama sa heart, lung, kidney, trauma, burn, orthopedic, dialysis, maternal ug neonatal care.
Mahimo usab kining clinical ug research facility sa MSU-General Santos City College of Medicine. Sumala ni Banas-Nograles, importante ang maong measure aron mas mapaduol sa mga taga-Region 12 ang specialized healthcare ug dili na sila mapugos sa pagbiyahe og layo alang sa pagpatambal.
Photo Courtesy: Wikipedia
