Mas molambo pa ang kalidad sa edukasyon ug imprastraktura sa mga tulunghaan sa Malaybalay human opisyal nga gipirmahan ang Supplemental Memorandum of Agreement (MOA) tali sa Local Government Unit (LGU) sa Malaybalay ug sa Department of Education (DepEd) Central Office sa Pasig City.
Gikabutya ni City Mayor Jay Warren Pabillara nga pinaagi sa maong kasabutan sa ubos sa GAA 2026 Basic Education Facilities Program, makadawat ang LGU Malaybalay og pondo nga nagkantidad og ₱46,266,552.75 nga gigahin alang sa pagpatukod og dugang mga classrooms ug pagpalit og mga bundled school furniture o mga bangko ug lamesa
Ang maong gidaghanon sa pondo bahin-bahinon ug ipang-apud-apud sa lima ka piniling eskwelahan sa dakbayan: ang Sawaga Elementary School, Cabangahan Elementary School, Casisang Central Integrated School, Kalasungay Central School, ug Linabo Central School.
Personal nga mitambong ang mga opisyal sa Malaybalay sa pakig-alayon ni Schools Division Superintendent Dr. Cherry Mae L. Reyes sa DepEd Central Office aron sigurohon ang pag-aproba sa maong proyekto nga gilaumang makahatag og mas maayong palibot sa pagtuon alang sa kabataan
Photo Courtesy: Mayor Jay Warren Pabillaran
