Makadawat og 60 pesos nga dugang sa adlaw-adlaw nga suhol ang mga minimum wage earners sa National Capital Region o NCR, sugod Septiyembre 26, 2026. Sumala sa Department of Labor and Employment o DOLE, ipatuman ang Wage Order NCR-28, diin mosaka gikan ₱695 ngadto sa ₱755 ang minimum wage sa mga non-agricultural workers.
Samtang ang minimum wage sa agricultural workers mosaka gikan ₱658 ngadto sa ₱718 kada adlaw. Gipagawas ang wage order sa Regional Tripartite Wages and Productivity Board-NCR human sa proseso sa wage-setting nga giapilan sa mga representante sa mga mamumuo, employer ug gobyerno.
Gipahinumdoman sa DOLE ang mga employer nga sundon ang bag-ong wage rates sa pagsugod sa implementasyon niini. Gibanabanang 1.1 milyon ka daily wage earners sa Metro Manila ang makabenepisyo sa wage increase, base sa datos sa DOLE.
Matud sa departamento, ang dugang-suhol gitumong sa pagpalig-on sa purchasing power sa mga mamumuo ug pagpalambo sa mas inklusibong pagtubo sa ekonomiya.
Photo Courtesy: HRM Asia/PNA
