Nagpabiling fair ang kahimtang sa kalidad sa hangin sa Digos City base sa monitoring data sa Environmental Management Bureau o EMB, ubos sa Department of Environment and Natural Resources o DENR.
Matud ni Nicole Delgado, RN, Nurse II sa Digos City Health Office, bisan fair ang classification sa kasamtangang monitoring, kinahanglan gihapon ang pag-amping sa publiko, ilabina niadtong sensitibo sa kausaban sa kalidad sa hangin.
Dugang ni Delgado, sa pagkakaron dili pa mandatory ang pagsul-ob og face mask. Apan mahimo gihapon kining gamiton isip dugang proteksyon batok sa posibleng epekto sa haze ug hugaw nga hangin.
Gihisgutan usab ni Delgado ang kahimtang sa ozone layer ug ang epekto sa deforestation. Iyang gipasabot nga importante ang pagpreserbar sa mga kahoy ug kalasangan tungod sa papel niini sa kinaiyahan ug kalidad sa hangin.
Samtang fair pa ang kalidad sa hangin sa Digos City base sa DENR-EMB monitoring, padayon gihapon ang pagmonitor sa kahimtang. Ang publiko giawhag nga sundon ang mga opisyal nga air quality ug health advisory kon adunay kausaban sa sitwasyon.
