Nagtinabangay ang Bureau of Internal Revenue o BIR ug International Monetary Fund o IMF aron mapalig-on ang tax compliance ug mas mapauswag ang sistema sa pangolekta sa buhis sa Pilipinas.
Sumala sa BIR, nakigpulong ang ahensya sa mga eksperto sa IMF niadtong Septiyembre 4 aron hisgutan ang Compliance Risk Management o CRM ug ang pagpatuman niini sa nagkalain-laing field offices.
Natumbok sa mga eksperto ang pipila ka sektor nga kasagarang adunay taas nga compliance risks, lakip ang construction, retail, tourism ug e-commerce. Matud ni BIR Commissioner Charlito Martin Mendoza, makatabang ang CRM sa pag-ila kung asa pinakadako ang risgo sa dili pagsunod sa mga obligasyon sa buhis aron mas tukma nga mahatagan og aksyon.
Pinaagi sa mas maayong paggamit sa datos ug risk assessment, gilauman nga mas mapunting sa BIR ang ilang resources ug interventions, samtang mapadali usab ang pagsunod sa mga taxpayer sa ilang tax obligations.
Photo Courtesy: PNA
