Gidakop sa kapulisan sa Edmond, Oklahoma ang usa ka 11 anyos nga batang babaye, human siya giakusahan sa pagpusil nga misangpot sa kamatayon sa iyang 15 anyos nga kuya.
Sumala sa Edmond Police Department, nadakpan ang bata pasado ala-una sa kadlawon niadtong Huwebes ug gidala sa usa ka juvenile facility, diin gi-book siya sa kaso nga second-degree murder. Wala gipagawas sa kapolisan ang iyang pangalan ug ubang impormasyon tungod kay menor de edad ang nalambigit.
Matud sa mga imbestigador, mitawag ang 11 anyos sa iyang inahan ug miingon nga adunay mipusil sa iyang kuya. Apan ang inahan wala sa lugar niadtong higayona. Ang 15 anyos nga biktima naigo og bala sa ulo ug namatay. Giila sa kapolisan nga makapaguol ug makapakurat ang maong insidente alang sa pamilya sa mga biktima.
Photo Courtesy: 6abc Action News
