Nagmadaugon ang South Cotabato II Electric Cooperative o Socoteco II batok sa pagsulay nga mapugngan ang plebisito alang sa proposed partnership niini uban sa Ignite Power and Energy Holdings Incorporated.
Sa 12-pahinang desisyon nga gipagawas niadtong September 11, gi-lift sa Regional Trial Court sa Polomolok, South Cotabato ang temporary restraining order o TRO nga kaniadto nagpugong sa plebisito. Gi-dismiss usab sa korte isip “speculative” ang alegasyon sa kakulang sa transparency sa pag-apruba sa conditional joint venture agreement.
Matud sa korte, wala pa mahuman ug pinal ang kasabutan tali sa Socoteco II ug Ignite Power, busa wala pa usab mapamatud-i ang mga alegadong kadaot nga mahimong resulta niini. Kung adunay makita nga iregularidad sa plebisito, mahimo gihapon kini nga dad-on sa korte ug mahimong hangyoon ang pag-nullify sa resulta o sa joint venture agreement.
Tungod sa desisyon, giingon sa Socoteco II nga makapadayon na ang pagboto sa mga member-consumer-owners sa plebisito, nga gikatakda sa September 19 hangtod 20 ug September 26 hangtod 27.
Photo Courtesy: SOCOTECO II
