Kumpirmadong nakabsan sa kinabuhi ang usa ka tawo samtang moabot sa 20 ka mga pasahero ang naangol human nadiskaril ang usa ka depasaherong tren sa Sokolniki Suche, Poland—nga anaa sa kapin 100 kilometros ang gilay-on gikan sa ulohang dakbayan sa Warsaw Poland
Sumala sa mga awtoridad, adunay gibabana-banang 120 ka mga pasahero ang sakay sa maong tren dihang nahitabo ang trahedya, nga mao na ang ikaduhang sunod-sunod nga aksidente sa riles sa maong nasud sulod lamang sa pipila ka semana.
Gipadayag sa inisyal nga imbestigasyon nga usa ka cement mixer ang nibangga sa luyo nga bahin sa carriage sa tren hinungdan nga nahaw-as kini sa riles. Samtang nagpadayon pa ang gihimong pagsusi sa mga otoridad aron matino ang tibuok detalye sa maong insidente, gipadayag ni Polish Prime Minister Donald Tusk nga usa kini ka seryosong panghitabo nga nagkinahanglan og dinalian ug subsob nga aksyon.
Mibagting usab ang pahimangno gikan sa pangulo sa kagamhanan nga gikinahanglan ang mas higpit nga pagpatuman sa mga regulasyon sa trapiko ug riles aron malikayan ang susamang trahedya sa umaabot.
Photo Courtesy: TVPWorld
