Posibleng mahuman na sa tuig 2027 ang dugay nang programa sa gobyerno sa pagpanghatag og mga farmlot ngadto sa mga mag-uuma nga walay kaugalingong yuta.
Matud sa Department of Agrarian Reform (DAR), anaa na sa katapusang bahin ang pag-apod-apod sa mga farmlot ubos sa Comprehensive Agrarian Reform Program (CARP).
Sumala kang Agrarian Reform Secretary Conrado Estrella III, mokabat na lang sa 20,000 ka ektarya ang nahibilin gikan sa target nga 5.4 milyon ka ektarya nga ipanghatag ngadto sa mga landless tillers.
Gilauman usab nga adunay pondo alang sa maong 20,000 ka ektarya sa 2027, apan sumala sa DAR, posibleng kulangon ang gigahin nga budget alang sa land distribution.
Bisan pa niini, positibo si Secretary Estrella nga makapadayon ang ahensya sa pag-apod-apod sa yuta, ug matud pa niya, mangita sila og lain-laing pamaagi aron dili mahimong babag ang kakulang sa pondo. Kung matuman ang target sa DAR, dakong lakang kini aron mas daghang mag-uuma ang makabaton og seguridad sa ilang panginabuhian.
