Misaka sa 7,115 tonelada kada adlaw ang sulfur dioxide (SO₂) emission sa bulkang Mayon, ang ikaduhang pinakataas nga natala sukad nagsugod og pagkunhod ang volcanic gas concentration niadtong Hulyo 16.
Sumala sa Philippine Institute of Volcanology and Seismology (Phivolcs), ang maong sukod nakuha pinaagi sa averaged measurements gamit ang stationary ultraviolet (UV) spectrometry.
Sukad gipaubos sa Alert Level 2 ang Mayon niadtong Agosto 5, anaa lamang sa average nga 3,844 tonelada kada adlaw ang SO₂ emission.
Kauban sa pagsaka sa gas emission ang gamay nga pagtaas sa Low-Frequency Volcanic Earthquakes (LFVQs), nga kasagarang nalambigit sa pagpagawas sa gas gikan sa bulkan.
Nakarekord ang Mayon Volcano Network og 12 LFVQs, samtang nagpabiling normal ang seismic energy release.
Nakamatikod usab ang Phivolcs og mubo nga panahon sa paghubag o pressure sa amihanang ug sidlakang bahin sa bulkan, nga posibleng timailhan sa pagbag-o sa kahimtang sa Mayon.
Nagpasidaan karon ang Phivolcs nga ang kalit nga pagsaka sa volcanic gas emission mahimong magtimaan sa posibilidad nga mobalik ang mas aktibong pagbuga o pag-erupt sa crater sa Mayon.
Nagpabilin kini sa Alert Level 2, apan giawhag ang publiko nga dili mosulod sa unom ka kilometro nga Permanent Danger Zone (PDZ).
Samtang gidasig usab ang mga komunidad ug lokal nga panggamhanan nga mangandam alang sa posibleng pagtaas sa alert level, lakip ang peligro sa lahar panahon sa kusog nga ulan, ug gipahimangnoan ang mga piloto nga likayan ang paglupad duol sa tumoy sa bulkan.
Photo Courtesy: PNA
