Dakpan sa mga operatiba sa Tagbina Municipal Police Station (Tagbina MPS) ang giilang “Top 1 Most Wanted Person” sa lungsod tungod sa kasong paglapas sa Republic Act 9262 kun Anti-Violence Against Women and Their Children Act didto sa Barangay Guinhalinan, Barobo, Surigao del Sur, karung adlawa Septiyembre 1, 2026.
Gipahigayon ang operasyon ubos sa pagdumala ni PCPT Mark Steven Y. Sarsonas, ang Acting Chief of Police sa Tagbina MPS. Nagmalampuson ang pagdakop pinaagi sa hiniusang pwersa sa Intelligence Operatives ug Tracker Team nga naghimo og pagpanubay ug beripikasyon sa nahimutangan sa akusado.
Giaprobahan sa korte ang warrant of arrest batok sa suspek, kinsang ngalan gipugngan una sa kapulisan aron mapanalipdan ang personal nga impormasyon ubos sa balaod. Gidala na ang dinakpan sa buhatan sa Tagbina MPS alang sa saktong dokumentasyon ug uban pang legal nga proseso.
photo courtesy: Tagbina MPS
