Nanguna sa iyang unang Command Conference isip bag-ong Regional Director sa Police Regional Office 13 o PRO-13 si PBGEN Rolindo M. Suguilon. Sa gipahigayon nga 1st Command Conference sa PRO-13 Conference Room, diin mitambong ang PRO-13 Command Group, mga miyembro sa Regional Staff, Butuan City Police Office Director, mga Provincial Director, Force Commander sa Regional Mobile Force Battalion 13, mga hepe sa Regional Administrative and Operational Support Units, ug mga hepe sa kapulisan gikan sa nagkalain-laing lungsod sa Caraga niadtong nakalabay nga adlaw.
Atol sa komperensya, gipresentar sa mga hepe sa Regional Operations Division ug Regional Investigation and Detective Management Division ang background ug kasamtangang kahimtang sa kriminalidad sa rehiyon. Gipahibalo usab ang mga nahimo sa PRO-13 ug ang kasamtangang crime statistics sa Caraga Region.
Gipasiugda ni PBGEN Suguilon ang kamahinungdanon sa teamwork, tukmang panahon nga pag-report, maayong komunikasyon, ug epektibong pagsulbad sa mga problema aron mas mapalig-on ang pagpatuman sa balaod ug mapadayon ang kalinaw ug kahapsay sa tibuok rehiyon.
Si PBGEN Suguilon bag-ong Regional Director sa PRO-13 nga mipuli kang PBGEN Marcial Mariano P. Magistrado IV, nga nakatakdang moretiro sa serbisyo sa Septyembre 26, 2026.
Photo courtesy: PRO 13
