Nakasugod og kusog ang University of San Carlos (USC) Warriors sa ilang kampanya sa CESAFI Season 26 human gipildi ang upat ka sunod-sunod nga defending champion nga University of the Visayas (UV) Green Lancers, 81-68 sa Cebu Coliseum.
Gipangulohan ni Jhoernel Tangkay ang USC sa iyang 18 puntos ug 11 rebounds, samtang nakakuha usab og siyam ka steals. Mitampo usab sila Real Aureo og 15 puntos, James Paolo Gica og 13 ug Jose Marie Tumabang og 12.
Nag-una sa UV si AJ Sacayan nga adunay 17 puntos, samtang si Kent Ivo Salarda mitampo og 10. Napakyas ang UV sa pagpangita og ritmo tungod sa 20 turnovers, samtang napugos sila sa USC og 19 steals ug lima ka blocks.
Bisan pa sa temporaryong paghunong sa duwa tungod sa rotational brownout sa Sugbo, mipadayon ang USC sa ilang kusog ug nakab-ot ang pinakataas nilang abante nga 16 puntos, 66-50, sa fourth quarter aron makompleto ang dakong upset sa opening day.
Photo courtesy: Cebu Daily News
