Nakuha sa veteran para swimmer nga si Ernie Gawilan ang labing unang bulawang medalya alang sa Pilipinas sa 5th Asian Para Games nga ginahigayon sa Rainbow Pool sa Nagoya City General Gymnasium didto sa Hapon. Gidominar sa 35-anyos nga lumad nga gikan sa Davao City ang Men’s 400-meter Freestyle S7 matapos niyang irehistro ang oras nga 4 minutos ug 56.72 segundos—ang iyang ikatulong sunod-sunod nga ginto sa maong event ug ikalimang ginto sa kinatibuk-ang kasaysayan sa torneyo.
Tungod sa maong impresibong kadaugan, opisyal usab nga nasiguro ni Gawilan ang usa ka luna alang sa 2028 Los Angeles Paralympics, matud pa ni national para swimming coach Tony Ong. Gipahinungod sa kampeon ang iyang kalampusan ngadto sa iyang asawa nga si Ilonah ug anak nga si Eliana, samtang gikatakda pa siyang makigsangka sa uban pang mga event sama sa Men’s 200m Individual Medley SM7 ug Men’s 100m Backstroke S7.
Samtang, nagdala og dakong inspirasyon ug kahayag ang kadaugan ni Gawilan taliwala sa hagit nga nasinati sa pipila ka atletang Pilipino sa unang adlaw sa kompetisyon. Samtang ang uban pang mga pambato sa judo ug table tennis sama nila Edmond Montecillo, Al Jaed Pacheco, Lhey Manginsay, Billy Cartera, Johna Pena, ug Noriko Batuhan padayon usab sa ilang pakigbisog ug sangka alang sa dungog sa nasud.
Photo courtesy: Philippine Paralympic Committee/FB
