Nasikop sa gipahigayong entrapment operation sa mga operatiba sa Criminal Investigation and Detection Group (CIDG) XI ang usa ka aktibong policewoman ug tulo pa ka indibidwal sa Governor Generoso, Davao Oriental niadtong nakalabay nga adlaw.
Base sa inisyal nga taho sa CIDG XI, giila ang policewoman nga si alyas “Riri,” usa ka Police Corporal nga nadestino sa usa sa mga estasyon sa Davao City Police Office (DCPO). Kauban usab nga gidakop si alyas “Jojo,” nga drayber ug giingong aktibong miyembro sa Civilian Active Auxiliary (CAA) sa 25th Infantry Battalion sa Philippine Army; si alyas “Jim,” usa ka trabahante nga giingong menor de edad; ug si alyas “Mat,” nga trabahante ug giingong tigbantay.
Lakip sa mga narekober sa operasyon ang pito ka master case sa ilegal nga sigarilyo, marked money nga gisagulan og boodle money, upat ka cellphone, duha ka handheld radio, mga identification card ug tulo ka susi.
Samtang, naghulat pa ang mga operatiba sa pag-abot sa mga saksi alang sa hingpit nga inspeksyon sa mga sakyanang giingong gigamit sa mga nadakpan. Ang upat ka dinakpan anaa na karon sa kustodiya sa kapulisan alang sa tukmang disposisyon ug dugang nga proseso subay sa balaod.
Photo courtesy: CIDG
