Naglunsad og dakong search and rescue operation ang mga awtoridad human kapin 20 ka tawo ang gikatahong nawala tungod sa grabeng flash flood sa Grand Canyon sa Arizona. Nahitabo ang insidente human mibundak ang kusog nga monsoon storm nga nagdala og hapit usa ka pulgada nga ulan sulod lang sa 30 minutos, nga dali nga nakapahinabo og kusog nga agos sa tubig, lapok, ug mga bato sa daplin sa Bright Angel Creek ug Phantom Ranch.
Kapin 60 ka hiker ug residente gikan sa apektadong lugar ang naluwas ug na-air evacuate pinaagi sa tabang sa National Park Service ug Arizona Department of Public Safety. Gidaut usab sa kusog nga baha ang halos tanang footbridge sa lugar, hinungdan nga temporaryong gisirhan ang Phantom Ranch, Bright Angel Campground, ug North Kaibab Trail hangtod sa wala pa matino nga petsa.
Padayon ang koordinasyon sa mga rescuers ug American Red Cross aron mahatagan og unang tabang ang mga apektadong pamilya samtang gipangita ang mga nangawalang tawo ubay sa daplin sa suba. Nagpabilin usab ang Flood Watch sa amihanang bahin sa Arizona tungod sa hulga sa dugang nga pag-ulan nga mahimong hinungdan sa bag-ong pagbaha ug pagdahili sa yuta.
Photo courtesy: Youtube storm-HQ
