Miabot na sa P6.16 bilyon ang kinatibuk-ang kadaot sa imprastraktura samtang mikabat usab sa P2.32 bilyon ang kapildihan sa sektor sa agrikultura tungod sa nagapadayong Southwest Monsoon o Habagat, sumala sa Office of Civil Defense (OCD).
Base sa report sa OCD Disaster Preparedness, mokabat sa 724 ka mga lugar sa tibuok nasud ang direktang naapektuhan sa dili maayong panahon, kusog nga pag-ulan, ug kaylap nga pagbaha.
Sa pagkakaron, padayon ang pag-assess ug pag-verify sa mga awtoridad sa mga kadaot sa mga kalsada, tulay, ug uban pang pampublikong pasilidad, lakip na ang mga nadaot nga pananom ug mga umahan sa humay. Gipasalig usab sa OCD nga padayon silang nakigkoordinar sa mga lokal nga panggamhanan ug uban pang ahensya sa gobyerno aron dali nga mahatag ang gikinahanglang tabang sa mga apektadong komunidad.
Samtang, gibalik sa mga awtoridad ang pahimangno sa mga residente nga nagpuyo sa mga ubos nga lugar ug flood-prone areas nga magpabiling alerto ug kanunay nga mosunod sa mga pahibalo ug direktiba sa lokal nga panggamhanan ug mga disaster response team, ilabina samtang nagpadayon ang dili maayong kahimtang sa panahon.
Photo courtesy: Philippine News Agency
