Giaprubahan sa komite ang mga panukala nga mag-postpone sa Barangay and Sangguniang Kabataan Elections o BSKE nga gitakdang ipahigayon sa Nobyembre 2026. Lakip usab sa mga panukala ang pagpalugway sa termino sa mga barangay officials gikan sa upat ngadto sa lima ka tuig. Pinaagi sa Senate Committee on Local Government nga gipangulohan ni Senator Francis “Chiz” Escudero, kauban ang ubang senador.
Ang desisyon sa komite gihimo niadtong Agosto 24, 2026, samtang ang BSKE karong 2026 gitakdang ipahigayon sa Nobyembre. Gihimo ang diskusyon atol sa hearing sa Senate Committee on Local Government.
Sumala ni Escudero, tumong sa Senate Bill No. 2387 nga ayuhon ang sistema sa termino sa mga opisyal sa barangay ug dili lamang yano nga pag-extend o pag-postpone sa ilang termino. Samtang, adunay laing panukala si Senator Imee Marcos nga ibalhin ang BSKE ngadto sa Oktubre 2027 tungod kay motakdo ang kasamtangang schedule sa All Souls’ Day.
Gipahayag usab ni Comelec Chairman George Garcia nga kapin P3 bilyon na ang nagasto sa Comelec gikan sa P8 bilyon nga gigahin nga budget alang sa BSKE. Apan, gitugyan na sa Kongreso ang katapusang desisyon kabahin sa iskedyul sa eleksyon ug sa termino sa mga barangay ug SK officials.
Sa pagkakaron, ang postponement sa BSKE hisgutan pa sa plenaryo sa Senado alang sa dugang nga deliberasyon ug desisyon.
Photo Courtesy: Wikimedia Commons
