Nakuha sa Metropolitan Manila Development Authority o MMDA ang dul-an 750 metriko toneladang basura ug mga debris gikan sa Redemptorist Water Channel sa Parañaque City, human natigom didto ang daghang basura tungod sa kusog nga ulan, taas nga tubig sa dagat ug pagkaguba sa trash trap.
Sumala sa MMDA, mikabat sa 748.87 metriko tonelada ang nakolektang basura, nga ana-a sa kapin 203 ka truckload.
Matud sa MMDA, ang dakong bahin sa basura napundo sa maong waterway human maputol o maguba ang trash trap, hinungdan nga nasudlan kini sa mga basura gikan sa Manila Bay, ilabina atol sa kusog nga habagat ug high tide.
Gipahayag usab nga ang nakolektang basura dad-on ngadto sa mga landfill sa San Mateo ug Rodriguez, Rizal.
Samtang, nagpadayon usab ang cleanup operations sa MMDA sa Dolomite Beach sa Manila, diin daghang basura ang naanod ug nangatagak sa baybayon.
Gipasiugda sa MMDA ang kahinungdanon sa hustong paglabay ug pag-segregate sa basura aron malikayan ang pagbabag sa mga kanal, sapa ug uban pang agianan sa tubig nga mahimong makapagrabe sa pagbaha.
Samtang, ang Philippine National Police mipalig-on usab sa ilang waste management measures sa mga police office ug komunidad.
Matud ni PNP Chief General Jose Melencio Nartatez Jr., kinahanglan manguna sa maayong ehemplo ang mga pulis pinaagi sa pagmintinar sa kalimpyo ug hustong pag-segregate sa biodegradable ug non-biodegradable nga basura.
Andam usab ang PNP nga motabang sa mga lokal nga panggamhanan sa pagpatuman sa mga ordinansa batok sa sayop nga paglabay sa basura.
Gipahinumdoman sa mga awtoridad ang publiko nga ang basura nga walay hustong paglabay mahimong mahan-ay ngadto sa mga waterways ug mahimong hinungdan sa pagbaha, ilabina panahon sa kusog nga ulan ug taas nga tide.
Photo Courtesy:Instagram
