Hugtanong gilimod ni Senate Majority Leader ug kanhi Senate President Juan Miguel “Migz” Zubiri ang mga alegasyon ni Department of Public Works and Highways Secretary Manuel Bonoan nga siya maoy naggunit sa listahan sa mga proyekto kon “leadership funds” alang sa mga senador niadtong siya pa ang pangulo sa senado.
Pamahayag ni Zubiri nga wala siya mohangyo ni mogunit og mga hangyo sa mga proyekto gikan sa mga senador ug wala usab matud pay mga “proposed budget amendments” nga miagi sa iyang opisina.
Matud ni Zubiri, nga ang tanang hangyo kabahin sa bisan unsang proyekto adto mag-agi sa Senate Committee on Finance, nga maoy nag-atiman sa proseso sa pundo sa senado.
Giklaro usab sa senador nga walay dautan sa mga institutional amendments nga gigahin alang sa mga karsada, taytayan, airports, seaports ug uban pang mga gikinahanglang infrastructure projects, kon kini gipatuman og sakto.
Ang pamahayag sa opisyal gipagawas niini human gikausahan ni Bonoan ang mga senador sa dakong pundo nga gihuptan niini. Sa akusasyon ni Bonoan, ang minimum allocation anaa sa ₱500 million matag senador, ug ₱1 billion alang sa mga chairperson sa mga dagkong komitiba sa senado.
Photo courtesy: BNC
