Nagpasaka si Senador Francis “Chiz” Escudero og balaudnon sa Senado nga nagtinguha nga palugwayan ang termino sa mga opisyal sa barangay ug Sangguniang Kabataan kun SK gikan sa upat ngadto sa lima ka tuig.
Ang Senate Bill No. 2387 nagtinguha nga usbon ang Republic Act No. 12232. Gani, iyang gipahayag nga ang sugyot nagtumong sa pagpalig-on sa kalig-on ug pagpadayon sa serbisyo publiko sa lebel sa barangay. Dugang pa niya nga ang mas taas nga termino makahatag og igong panahon sa mga lokal nga opisyal aron mapadayon ug mahuman ang mga programa ug proyekto nga kinahanglan sa ilang komunidad.
Sumala pa sa Senador nga makatabang usab ang maong lakang sa pagpakunhod sa mga pagkabalda sa serbisyo ug aron mas makapokus ang mga opisyal sa pagserbisyo sa katawhan.
Ubos sa gisugyot nga transitory provision, ang kasamtangang mga opisyal sa barangay ug SK mahimong makadawat og dugang nga duha ka tuig sa ilang kasamtangang termino. Samtang gipahibalo usab sa balaudnon nga ang mga kasamtangang opisyal sa barangay nga nagserbisyo na sa ilang ikatulo nga sunod-sunod nga termino sa parehas nga posisyon dili na mahimong modagan pag-usab alang sa maong posisyon sa eleksyon sa Nobyembre 2028.
Kini nga lakang nagtumog nga hatagan og mas taas nga panahon ang mga opisyal sa barangay ug SK aron mapadayon ang ilang mga programa ug serbisyo, apan kinahanglan pa gihapon kini nga maaprobahan sa Senado.
Photo Courtesy: Philippine News Agency
