Viral sa social media ang usa ka makalingaw nga panghitabo, diin adunay usa ka kabaw kauban sa iyang hubog nga amo ang nagbaktas sa kadalanan ug padulong na muoli.
Matod pa ni Marlo Lualhati, kinsa nagkuha sa maong video nga iyang narekord ang maong panghitabo samtang pauli usab siya, diin makita ang lalaki nga nagkalisod sa paglakaw tungod sa kahubog ug ang kabaw nagpabilin gihapon sa iyang tupad.
Sumala pa sa uban nga ang maong hayop mura matud pa og tawo gumikan kahibalo kini sa sitwasyon sa iyang amo ug padayon nga gina-alalayan. Daghang mga netizens ang natandog ang kasing-kasing ug daghan usab ang nagdayeg sa gibuhat sa maong kabaw.
Samtang ang maong insidente nahimong pahinumdom usab sa uban nga ang mga hayop makahimo og pagpakita sa pagkamatinud-anon ug pag-atiman sa ilang mga amo. Sa karun, ang maong video nakaani na og kapin 1.9 milyon ka views sa Facebook.
Photo Courtesy: Marlo Lualhati
