Gipahibalo sa Moderna niadtong Miyerkules nga giaprobahan na sa US Food and Drug Administration (FDA) ang bag-ong bakuna niini batok sa trangkaso human sa temporaryong pagsalikway sa regulator nga mukabat sa hapit sa unom ka bulan.
Sumala sa Moderna, ang maong bakuna gitawag nga mFLUVISA nga naggamit sa mRNA technology, kun diin magamit kini sa mga hamtong nga nag-edad sa 50 anyos pataas.
Kahinumdoman nga niadtong Pebrero, gisalikway kini sa mga federal vaccine regulators kay kuno kulang ang clinical trials, apan giusab sa FDA ang ilang baruganan sa dihang gihimo ang usa ka tigum nga gihulagway sa Moderna nga mapuslanon ang maong bakuna.
Kahibaloan nga ubos sa administrasyon ni US President Donald Trump ug Health Secretary Robert F. Kennedy Jr., gitawag sa mga federal health regulators ang pagrepaso sa pipila ka mga pamaagi sa pag-apruba sa mga bakuna, lakip na ang mga bakuna batok sa trangkaso. Ang maong mga lakang nagresulta usab sa kabalaka taliwala sa pipila ka mga propesyonal sa panglawas ug medisina.
Nasayran nga ang mRNA technology gigamit usab sa pipila ka mga bakuna batok sa COVID-19 ug nakatabang sa pagpadali sa pagpalambo sa bakuna panahon sa pandemya.
Photo Courtesy: The Moderna
