Nahitabo ang talagsaong sitwasyon sa kawanangan, dihang mibusikad ang SpaceX Falcon 9 rocket padulong sa bulan ang ikaduhang bahin o upper stage, Miyerkules, human kini molupad sa kawanangan sulod sa kapin usa ka tuig.
Sumala sa mga siyentipiko, ang rocket nagbiyahe sa kapin 5,000 ka milya matag oras sa dihang nahitabo ang impact duol sa Einstein Crater.
Nadiskobrehan sa Very Large Telescope sa European Southern Observatory sa Chile ang maong impact, diin namatikdan ang presensya sa sodium ug lithium gas sulod sa lima hangtod napulo ka minuto human sa pagbangga.
Gituohang ang sodium gikan sa yuta sa bulan, samtang ang lithium posibleng gikan sa mismong rocket. Ang Falcon 9 gilunsad niadtong Enero 15, 2025 aron magdala og duha ka komersyal nga lunar landers.
Human matuman ang misyon, nagpabilin sa kawanangan ang upper stage rocket. Sumala sa SpaceX, tungod sa kombinasyon sa solar activity ug gravitational forces, nausab ang agianan niini hangtod nga mibangga kini sa bulan.
Padayon karon nga giproseso sa mga siyentipiko ang mga datos ug hulagway aron mas masuta ang epekto sa maong impact sa lunar surface.
Ang maong panghitabo gilauman nga makatabang sa dugang pang pagtuon sa bulan ug sitwasyon sa mga spacecraft nga magpabilin sa kawanangan human sa ilang misyon.
Photo Courtesy: BBC
