Giklaro ni National Bureau of Investigation (NBI) Director Atty. Melvin Matibag nga wala pa maaresto si Sen. Ronald “Bato” Dela Rosa, sukwahi sa mga balitang mikaylap sa social media niadtong Martes, Agosto 4.
Sa ambush interview, giingon ni Matibag nga dili ang ilang grupo ang nagpahigayon sa giingong pagdakop sa senador, ug wala usab siyay nahibal-an nga nahitabo na kini.
Gipasabot pa niya nga nagpadayon matag adlaw ang operasyon sa pagpangita kang Dela Rosa, nga giatubang sa warrant of arrest gikan sa International Criminal Court (ICC) tungod sa giingong crimes against humanity nga nalambigit sa kampanya batok sa ilegal nga droga atol sa administrasyon ni kanhi Presidente Rodrigo Duterte.
Sa miaging mga pahayag, giingon ni Department of Justice (DOJ) Spokesperson Atty. Polo Martinez nga wala pa silay detalye bahin sa giingong pagdakop kang Dela Rosa. Ingon usab si Department of the Interior and Local Government (DILG) Secretary Jonvic Remulla, nga wala siyay nadawat nga impormasyon nga nagpamatuod sa maong balita.
Samtang, miingon si Sen. Panfilo “Ping” Lacson nga “negative” ang impormasyong iyang nadawat gikan sa iyang mga kontak sa NBI, ug wala usab siyay nakuhang kumpirmasyon gikan sa Philippine National Police (PNP) ug Armed Forces of the Philippines (AFP). Matud pa ni Lacson, kon tinuod nga nadakpan na ang senador, lagmit gidala na unta kini sa airport aron ipadala sa The Hague, Netherlands, diin nahimutang ang ICC ug diin usab gidetine si kanhi Presidente Rodrigo Duterte.
Midugang usab sa mga espekulasyon ang Facebook post ni Atty. Jimmy Bondoc, nga nag-ingon, “Bad news is coming. Pray hard that it is not true, for the good of the nation.” Apan wala niya direktang gihisgoti si Sen. Dela Rosa sa iyang post.
Sa pagkakaron, wala pa’y opisyal nga kumpirmasyon nga naaresto na si Sen. Ronald “Bato” Dela Rosa, samtang gipamatud-an sa NBI nga nagpadayon gihapon ang manhunt operation batok kaniya subay sa umiiral nga warrant of arrest nga gipagawas sa ICC.
Photo Courtesy: wikipedia
