Sugod Agosto 15, mahimong P12 kada litro ang diskwento sa petrolyo alang sa mga drayber sa jeepney ug UV Express, subay sa direktiba ni Presidente Ferdinand Marcos Jr. nga dugangan ang fuel discount alang sa sektor sa transportasyon.
Matod ni Executive Secretary Ralph Recto, kung mapatuman na kini, makaangkon ang matag drayber og benepisyo nga mokabat sa P1,800 matag semana. Kini dugang sa unang P10 kada litro nga diskwento nga gisugdan niadtong Abril ug nakatabang na sa kapin 93,000 ka PUV drivers.
Ang desisyon nahimo atol sa miting nga gipangulohan ni Executive Secretary Recto uban sa mga miyembro sa gabinete niadtong Agosto 4 sa Malacañang. Gihisgutan sa tigom ang mga lakang sa gobyerno aron mapalig-on ang ekonomiya, mapugngan ang pagsaka sa presyo sa mga palaliton, ug mapadayon ang suporta sa mga sektor nga direktang naapektuhan sa tensyon Middle East.
Gimandoan usab ni Recto ang Department of Social Welfare and Development o DSWD nga masiguro ang pag-abot sa UPLIFT assistance ngadto sa mga kabus ug nanginahanglan, lakip ang mga mag-uuma, mangingisda, mga drayber sa pampublikong transportasyon, mga trabahante sa konstruksyon, ug uban pang mga low-income workers. Una nang gipasiugda ni Presidente Marcos ang pasalig sa gobyerno nga magpadayon sa pagtabang sa mga sektor nga labing naapektuhan sa mga hagit sa pangkalibotang ekonomiya.
Photo courtesy: Philippine News Agency
