Gitawag sa House prosecution counsel nga si Atty. Lorna Kapunan nga usa ka “scam” ang paggasto sa Office of the Vice President (OVP) ug Department of Education (DepEd) sa ilang milyon-milyong confidential funds atol sa impeachment trial ni Vice President Sara Duterte niadtong Martes, Agosto 4.
Sa pagpadayon sa husay, gipangutana ni Kapunan ang testigo ug kanhi auditor sa Commission on Audit (COA), Roderick Wamil, bahin sa mga lagda sa gobyerno sa paggamit sa pondo sa publiko.
Sumala sa COA circular, kung ang pondo sa gobyerno dili maipatin-aw o kulang sa igo nga mga dokumento, adunay presumption o prima facie evidence nga kini gigamit alang sa personal nga kaayohan sa usa ka opisyal. Sa dihang gikumpirma sa testigo nga ang lagda angay sa gipresentar nga kahimtang, miingon si Kapunan sa iyang katapusang komento sa wala pa matapos ang pagpangutana, “Kung ako ang pangutan-on, scam kini.”
Human niini, misukol dayon ug nag-object si Atty. Michael Poa, abogado ug tigpamaba sa depensa, nga nag-ingon nga dili angay ang pahayag sa prosecution counsel. Gidapigan ni Senate Impeachment Presiding Officer Francis “Chiz” Escudero ang objection sa depensa ug nagmando nga i-strike off the record o tangtangon sa opisyal nga rekord sa impeachment court ang komento ni Kapunan.
Photo Courtesy: Instagram
