Dili moubos sa pito ka tawo, lakip ang tulo ka mga bata, ang namatay human maigo sa usa ka drone ang usa ka puno sa tawo nga baybayon sa Arkhipo-Osipovka sa Krasnodar region sa habagatang Russia. Sumala sa mga awtoridad, mikabat sa 40 ka tawo ang nasamdan, diin 17 kanila ang gidala sa ospital aron matambalan.
Giakusahan sa gobernador sa Krasnodar ang Ukraine sa gihulagway niyang “tinuyo nga pag-atake sa mga sibilyan,” apan hangtod karon wala pa’y opisyal nga pahayag gikan sa Kyiv bahin sa insidente. Sa mga bidyo nga mikaylap sa social media, makita ang drone nga nahulog sa baybayon ug mibuto samtang daghang mga turista ang nagpahayahay ug nangaligo sa dagat.
Wala pa matino kung unsa ang target sa drone. Sumala sa pipila ka mga taho, posible nga nahulog kini sa baybayon tungod sa electronic jamming o kay natirahan sa air defense system sa Russia. Giingon usab sa mga saksi nga wala’y sirena nga mitingog sa wala pa ang insidente, ug adunay uban nga mitago luyo sa mga beach chair samtang ang uban nakadungog og sunod-sunod nga mga buto sa wala pa ang kusog nga pagbuto.
Padayon sa gihapon ang long-range attacks tali sa Russia ug Ukraine taliwala sa nagpadayon nga gubat, diin sa milabay nga tuig gipalapdan sa Ukraine ang mga pag-atake sulod sa teritoryo sa Russia nga nagtumong, sumala sa mga taho, sa imprastraktura ug mga pasilidad nga may kalabotan sa militar.
Photo courtesy: Arbiterz
