Mihinay ngadto sa pinakaubos nga lebel sulod sa upat ka bulan ang pagtubo sa wholesale prices niadtong Hunyo tungod sa mas ubos nga presyo sa global nga lana ug pagkunhod sa tensyon sa geopolitika nga nakaapekto sa dagkong mga produkto.
Sumala sa unang datos sa Philippine Statistics Authority (PSA), ang pagtubo sa General Wholesale Price Index (GWPI) sa tibuok nasod miubos ngadto sa 2.3% niadtong Hunyo gikan sa 3% sa samang panahon sa miaging tuig ug 2.5% niadtong Mayo. Kini ang pinakahinay nga pagtubo sukad sa 1.7% nga natala niadtong Pebrero.
Matud sa PSA, ang paghinay sa wholesale price growth tungod sa mas hinay nga pagsaka sa presyo sa mineral fuels, lubricants ug uban pang may kalabutan nga materyales nga miubos ngadto sa 29.3% sa Hunyo gikan sa 36.2% sa Mayo, ingon man sa machinery ug transport equipment nga miubos ngadto sa 1.1% gikan sa 1.2%.
Ang mas dako nga pagkunhod sa presyo sa hilaw nga materyales ug mga kemikal, lakip ang animal ug vegetable oils ug fats, nakatabang usab sa pagpaubos sa index. Sumala sa mga ekonomista, ang mas ubos nga presyo sa global nga lana ug pagkunhod sa tensyon sa Middle East ang nakapahinay sa pressure sa presyo sa mga produkto.
Sa rehiyon, ang wholesale price growth sa Luzon miubos ngadto sa 2.2% sa Hunyo gikan sa 3.2% sa miaging tuig, samtang sa Visayas misaka kini ngadto sa 3.8% apan mas hinay kumpara sa 5.1% sa Mayo. Sa Mindanao, misaka ang pagtubo ngadto sa 1.9% gikan sa 1.1% sa miaging tuig apan mikunhod gikan sa 2.2% sa miaging bulan.
Gilauman sa mga eksperto nga mahimong mosaka pag-usab ang GWPI sa ikaduhang bahin sa tuig tungod sa posibleng pagtaas sa demand ug gasto sa ekonomiya, apan gilauman usab nga magpabiling kontrolado ang wholesale inflation basta walay dagkong problema sa suplay, presyo sa enerhiya, panahon, ug paglihok sa exchange rate.
Photo courtesy: wikipedia
