Magpasaka ang National Bureau of Investigation (NBI) og dugang 30 ka kaso sa Department of Justice (DOJ) nga may kalabutan sa mga ma-anomalosong flood control projects sa nagkadaiyang dapit sa nasud.
Sumala ni NBI Director Melvin Matibag, miabot na sa 27 ka kaso ang ilang gipang-andam nga ipasaka, lakip na ang mga reklamo batok kanila Sen. Jinggoy Estrada, kanhi Senador Bong Revilla, kanhi Department of Public Works and Highways (DPWH) Secretary Manuel Bonoan, ug pipila ka mga district engineers sa DPWH.
Gipatin-aw usab ni Matibag nga ang ilang imbestigasyon dili lang nakasentro sa Taguig City, nga balwarte ni Senate Minority Leader Alan Peter Cayetano. Matud pa niya, mas lapad ug mas komprehensibo ang sakop sa mga kasong gipang-atubang karon sa NBI, ug padayon ang ilang pagpukos sa tanang mga proyektong kontra-baha sa nasud nga gidudahang giabusohan ug gigamit sa korapsyon.
Pinaagi niining nagpadayong imbestigasyon, tumong sa NBI nga mapalapdan pa ang panubag sa tanang mga indibidwal ug opisyal nga nalambigit sa mga proyektong nakapahimo og dakong pagkalugi sa kaban sa nasud.
Photo Courtesy: NBI
