Naluwas sa mga awtoridad ang usa ka 33-anyos nga babaye human kini misulay sa pag-ambak sa Atugan Bridge sa Sayre Highway, Barangay Capitan Bayong, Impasugong, Bukidnon, mga alas 1:09 sa hapon niadtong Agosto 2, 2026.
Ang maong paspas nga aksyon nahimo pinaagi sa pagresponde sa Impasugong Municipal Police Station ug sa mga sakop sa Revitalized Police Sa Barangay (RPSB) Impasugong Cluster nga niadtong higayona nagpahigayon og traffic control sa maong taytayan.
Base sa inisyal nga imbestigasyon, usa ka concerned citizen ang mitaho sa mga kapulisan nga adunay babaye nga nagtindog sa daplin sa taytayan ug daw nagtinguha nga molukso. Paspas nga miaksyon ang mga responder ug napugngan ang babaye sa wala pa niya mahimo ang maong buhat. Atol sa pag-estorya sa mga pulis, gipadayag sa babaye nga nakahunahuna siya sa paghikog tungod sa grabeng emosyonal ug mga suliran sa iyang pamilya, diin gihatagan dayon siya og crisis intervention aron mapakalma.
Human makontrolar ang sitwasyon, gidala ang maong babaye sa Impasugong Municipal Police Station alang sa dokumentasyon ug gihan-ay na ang pag-refer kaniya sa mga angay nga ahensya sa gobyerno alang sa dugang psychosocial intervention. Nagpadayon usab ang kapulisan sa ilang imbestigasyon ug pagsusi sa maong insidente aron matabangan sa sakto ang maong indibidwal
Photo Courtesy: Impasugong Municipal Police Station
