Nagpabiling hamis ang nawong sa usa ka 50-anyos nga babaye nga nailhan nga si Tess Christian ang nakapukaw sab sa interes sa daghang tawo human niyang ibutyag nga wala siya mipahiyom sa publiko sulod sa 40 ka tuig tungod sa iyang pagtuo nga makatabang kini aron malikayan ang mga kunot o wrinkles sa nawong.
Matud ni Christian, nagsugod ang iyang desisyon sa edad nga 10-anyos. Sukad niadto, gihimo niyang batasan ang pagpabiling walay ekspresyon sa nawong bisan sa mga espesyal nga higayon sama sa mga salo-salo, pakig-date, adlaw sa iyang kasal, ug bisan sa pagkahimugso sa iyang anak nga si Stevie.
Bisan pa sa kanunay nga hangyo sa photographer sa ilang kasal niadtong 1993 nga mopahiyom siya alang sa mga litrato, nagpabilin siyang seryoso gumikan mao na kini ang iyang naanad nga pamatasan.
Gipadayag usab ni Christian nga bisan og mobati siya og dakong kalipay ug malingaw, dili niya kini ipakita pinaagi sa pagpahiyom. Matud niya, mahimo siyang mokatawa ug malipay apan dili kinahanglan nga makita kini sa iyang nawong.
Sa dihang nakaabot siya sa edad nga 40, namatikdan niya nga mas hamis ang iyang nawong kumpara sa ubang ka edad niya ug wala siyay mga kunot sa palibot sa baba. Tungod niini, nagtuo siya nga ang iyang dugay nang paglikay sa pagpahiyom maoy hinungdan sa pagpreserbar sa iyang panit.
Sumala sa pipila ka mga dermatologist, adunay siyentipikong basehan ang maong pangagpas kay ang balik-balik nga lihok sa mga kaunoran sa nawong mahimong makatampo sa pagporma sa expression lines o wrinkles. Mao usab kini ang prinsipyo nga gigamit sa Botox, nga nagpakunhod sa lihok sa mga kaunoran aron malangan ang pagpakita sa mga kunot.
Bisan pa niini, daghan ang adunay nagkalain-laing reaksyon sa iyang istorya. Adunay mga nag-ingon nga dili angay isakripisyo ang pagpakita sa kalipay alang lamang sa pagmintinar sa hamis nga panit, samtang ang uban nagpakita usab og kabalaka sa emosyonal nga epekto niini sa iyang anak nga wala makakita sa iyang inahan nga mipahiyom sukad pagkabata.
Apan alang kang Christian, wala siyay pagmahay sa iyang desisyon. Giingon niyang malipayon siya sa kinabuhi ug wala lang gyud niya makita ang panginahanglan nga ipakita kini pinaagi sa pagpahiyom. Sa iyang pagtan-aw, ang pagpreserbar sa iyang nawong pinaagi sa maong disiplina usa ka personal nga pagpili nga iyang gipadayon sulod sa upat ka dekada.
Photo Courtesy: Bored Panda
