Gikumpirma ni Department of Migrant Workers (DMW) Secretary Hans Cacdac nga mikabat na sa tulo ang namatay nga mga Pilipinong seafarer tungod sa mga pag-atake sa mga barkong nakadunggo sa mga pantalan sa Ukraine sa northern Black Sea.
Sumala ni Cacdac, sa 236 ka Pilipinong tripulante sakay sa 17 ka apektadong barko, 217 ang luwas, 15 ang naangol, ug 89 na ang nauli sa Pilipinas, lakip ang siyam ka nasamdan. Nagpadayon usab ang DMW sa paghatag og suporta sa mga pamilya sa mga namatay ug sa pagpauli sa ilang mga patayng lawas.
Gimando usab sa DMW ang pagpauli sa tanang Pilipinong seafarers nga anaa sa mga barkong giatake, samtang ang mga barkong wala pa maapil sa pag-atake gipabalhin sa mas luwas nga mga pantalan.
Gidid-an usab ang mga barko nga adunay Pilipinong tripulante sa paglayag padulong sa maong lugar.
Matod ni Cacdac, base sa pagtimbang-timbang sa Department of Foreign Affairs ug Department of National Defense, taas kaayo ang lebel sa kadelikado sa maong lugar, busa wala na’y Pilipinong seafarer nga angay ipadala ngadto sa northern Black Sea hangtod nga moluwas na ang sitwasyon.
Photo Courtesy: Philippine News Agency
