Dili moubos sa 14 ka tawo ang namatay human sa usa ka gituohang suicide bombing sa gawas sa usa ka estasyon sa pulisya sa amihanang-kasadpang bahin sa Pakistan. Nahitabo ang pagbuto sa Kabal area, Swat district, Khyber Pakhtunkhwa province, diin lakip sa mga namatay ang lima ka pulis, walo ka sibilyan, ug ang gituohang suicide bomber. Adunay usab 18 ka tawo ang nasamdan sa insidente.
Nahitabo ang pagbuto samtang adunay ginahimong pro-police rally sa lugar, apan wala pa klaro kung kini ba ang target sa pag-atake. Giangkon sa militanteng grupong Tehreek-e-Taliban Pakistan ang responsibilidad sa pagpamomba. Gipahayag usab ni Pakistani Prime Minister Muhammad Shehbaz Sharif ang iyang pahasubo ug gikondena ang pag-atake.
Naglunsad na ang kapulisan og operasyon aron mailhan ug madakpan ang ubang posibleng nalambigit sa pagpamomba. Nagpadayon gihapon ang Pakistan sa pag-atubang sa nagkadugang nga mga pag-atake sa mga militanteng grupo, ilabi na sa mga dapit duol sa utlanan, diin kasagarang target ang mga pulis ug militar. Padayon usab nga giakusahan sa Pakistan ang Taliban sa Afghanistan sa pagsuporta sa mga militanteng grupo, apan hugot kining gilimod sa Taliban.
Photo courtesy: AP News/CNN
