Magpatuman ang Bangko Sentral ng Pilipinas (BSP) og mas hugot nga regulasyon batok sa dili patas nga pamaagi sa pagpangolekta og utang sa mga online lending companies’ kung makuha na niini ang hingpit nga pagdumala sa sektor.
Matod ni BSP General Counsel Roberto L. Figueroa, prayoridad sa bangko sentral ang paghimo og mga lagda batok sa mapang-abusong pagpautang ug pagpangolekta og utang nga nakadaot sa mga konsumedor.
Sumala ni Figueroa, gisusi na sa BSP technical working group ang mga kasamtangang balaod may kalabotan sa regulasyon sa mga online lenders. Ang Securities and Exchange Commission (SEC) usab nagtakda og multa batok sa mga kompanya nga mapamatud-ang nakahimo og unfair debt collection practices, lakip ang multa nga moabot sa gatusan ka libong piso ug posibleng pagsuspenso o pagbawi sa ilang permit sa operasyon. Gisuportahan usab sa SEC ang pagbalhin sa pagdumala sa online lenders ngadto sa BSP aron mas mapalig-on ang pagdumala sa sektor.
Apan nagpadayon pa ang diskusyon sa pagbalhin tungod kay ang kasamtangang mga balaod naghatag sa SEC sa direktang gahum sa pagdumala sa mga nonbank lending ug financing companies. Matod sa BSP, ilang gitun-an kung mahimo ba kini pinaagi sa kasamtangang mga regulasyon o kinahanglan og bag-ong balaod gikan sa Kongreso.
Gisuportahan usab sa digital finance industry ang lakang, nga nagtuo nga makatabang kini sa mas maayong proteksyon sa mga konsumedor ug mas hugot nga pagdumala sa online lending industry.
Photo courtesy: Philippine News Agency
